बाजारपेठ आणि नफ्यासाठी वेगवेगळ्या साम्राज्यवादी मक्तेदारांच्या दरम्यानची गळेकापू रस्सीखेच, म्हणजेच लुटण्याच्या स्पर्धेत अव्वल ठरण्यासाठी एकूणएक डावपेच वापरण्याची परंपरा तशी जुनीच आहे. या शृंखलेच्या रूपात सध्या आपण युक्रेन विवाद अनुभवत आहोत. एका बाजूने अमेरिका आणि युरोपीय संघ आपल्या साम्राज्यवादी उद्देश्यपूर्तीसाठी युक्रेनच्या उग्रराष्ट्रवाद्यांद्वारे सरकारच्या तख्तापलटाचे समर्थन करीत आहेत तर दुसऱ्या बाजूने रशियासुद्धा युक्रेनमध्ये पाश्चिमात्य घुसखोरी हाणून पाडण्यासाठी पुरेपूर प्रयत्न करीत आहे. दोन्ही बाजूंनी परस्परविरोधी वाग्बाणांचा वर्षाव अखंड सुरू आहे. अमेरिका रशियाला एकतर्फी प्रतिबंध आणि व्यापार प्रतिबंधाची धमकी देते आहे तर रशियासुद्धा प्रत्युत्तरादाखल प्रतिबंधाच्या धमक्या देते आहे.